يسقط جهاز شرطة معمر

مقر جهاز الأمن الداخلي 1

مقر جهاز الأمن الداخلي ” الإستخبارات ” – طريق السكة – طرابلس – ليبيا Copyright: Ahmed ZBEDA All right reserved www.ok.ly 

اليوم كان  ليكون يوما عاديا في حياتي حيث انني استقليت سيارتي واتجهت لمبنى تابع للأمن الداخلي سابقا(مكافحة الزندقة سابقا) ،الكائن بطريق السكة امام رئاسة الوزراء بعد ان  تفاهمت انا والضابط التحقيق في المكان للروجوع مرة اخرى لأنني ابحث عن مستندات تخصني واوراق وحتى يمكن اقفال محضر التحقيق الذي تقدمت بشكوى فيه بخصوص الاشخاص المتورطين باعتقالي، لقد  زرت هذا المكان ثلاثة مرات وفي كل مرة اجهش بالبكاء ،وانهار،وابقى في حالة شرود لأن هذا المكان يرتبط بذكريات مؤلمة.

 اليوم قالي لي السيد عماد الضابط في مكتب امن المعلومات وهو الأسم الجديد لمبنى البشع(الامن الداخلي طريق السكة) غيداء  يمكننا ان نكمل التحقيق ونبحث عن اوراق اليوم تخصني .
ارتديت سترتي الخضراء احب هذه السترة لانني اريد ان اخرج من قوقعة اللون الاخضر المكروه لانه لون علم القذافي ،وذهبت للمكان وبحتث عن مكان ولم اجده واضطررت  لركن سيارت في موقف سيارات لمصرف ملاصق بالمكان ،وترجلت من سيارتي مع العديد من المعاكسات من رجال ليبين سيئين.

دخلت البوابة الرئيسية دون اي مشاكل ثم تقدمت للبوابة الثانية في الداخل ،وتقدمت  بإبراز هويتي لشرطي المكلف  بأخذ الاسماء في الباب واثبات الهوية وإذا بي ارى شخص يهجم بسرعة يقول لي بلهجة ونبرة  مستفزة( انتي انتي وين ماشية)!!،
التفت اليه وقلت له اولا انا لست انتي انا انسانة مواطنة ليبية وسجينة سابقة واتبت هنا لاجل عمل خاص بقضيتي 

فرد علي
(ممنوع ممنوع المراجعة للمنظومة الاحد والاربعاء!!)
قلت له حسنا أنا لا ابحث عن المنظومة لدي كل الاوراق الثبوتية ،والمستندات من ملفي في جهاز المخابرات التي تؤكد فترة اعتقالي لمرتين والتحقيق معي ،أنا هنا لأنه هناك ضابط تحقيق استدعاني لإكمال التحقيق !
لم يقتنع هذا الشرطي واعتقد انه اللون الاخضر استفزه واستفزته فتاة تعارضه وترد عليه بالحجة.
نظر الي بنظرات دونية ومن ثما بدأ يصرخ
والله ماك خاشة اهني والله ماك راكبة فوق !!
قتله اني جاية بناءا على موعد مع الضابط يا استاذ .

اصر قائلا:- اتصلي بيه توة
اتصلت بضابط التحقيق عماد  واثناء فترة نزول الضباط قلت له:_

هذا المكان لابد ينهد وينبى بدله تذكار  يذكر الليبين بفترة القمع هو و هما نفسكم نفس الاسلوب ونفس المعاملة وكل شي متغيرش  ، انت طريقة معاملتك سيئة وهذا انتهاك لحقوقي 
 المعاملة الي قبل وقت معمر هي هي يخي وقت نظام معمر كانو يخافو من رؤوسائهم وفي البوابة كل مانستدعى للتحقيق معاملة الباب كانت كويسة.

 معقولة قتله نتعامل بنفس الطريقة حتى بعد الثورة ؟

 الشرطي النذل الفاسد صاحب الشفاه القرمزية المتورمة، والمؤخرة المشدودة لم يكتفي بهذا بل اصر على عدم دخولي، وحلف يمين طلاق انني لن اصعد فوق حتى بعد نزول الضابط واخباره انها هنا بإستدعاء منه لاكمال التحقيق! قلت له بصوت عال:-

(انت وين كنت تخدم في شرطة معمر وداخلي معمر اني واهلي تبهدلنا على خاطر ليبيا تولي دولة تحترم حقوق المواطنين وبلد القانون ، واني هنا بامر القانون
وهني حاول يتهجم عليا وبدأ يصور ويجول والزبد يرغى من فمه بطرقة مقرفة 
 لكن بعض الموجودي من الشرطة  قالولي احني نحلو المشكلة معاه افندي عماد قالي روحي ورفعه للتحقيق الادراي واني مشيت طلعت قعدت نبكي طول الطريق اتصل بيا افندي عماد  لانه لقاني طلعت واني نبكي يسأل عليا

 رديت عليه واني مخنوقبة بالعبرة اني قتلك المكان هذا منحباش تعرضت فيه للاهانة مرات ومرات في عهد معمر ويوم 16 فبراير جابوني ليه ذليلة صاغرة اني المكان هذا وقت نخشه نحس بالم وغصة في قلبي 
قالي افندي عماد الموضوع ميطلعش من ادارة امن المعلومات احني حنفتحو تحقيق

لكني اني كبنت ليبية تعرضت للاهانة مش حنسكت واصريت اني نفتح محضر في مركز شرطة نثبت فيه سوء معاملة الشرطي ،ونذالته ولما وصلت لمركز بابا بن غشير لقيت معاملة محترمة كويسة
 والشباب تلقطو يسمعولي شن القصة وفي منهم لقيته يتابع فيا على الانترنت ، ماشاء الله على معاملتهم محترمين وكويسين اني قتلهم اني منقولش الشرطة كلها مش كويسة لكن مفروض انتو تطلعو مش كويس معدش يخدم في الجهاز لانه يسئ للشرطة..

كملت المحضر  وصورت   صور من داخل   المركز نشوف في  الخراب والدمار الي فيه والعمل يسير عادي جدا لكن لحق المركز متهالك ووقت سألت قالولي حتى مسدسات معنداش.
قالولي  لو جي يتأسفلك تنهي الموضوع؟
 قتلهم  اني منبيش  تأسف ولا اعتذار اني شكيت باش يكون هو وغيره عبرة لغيره يعرف انه العلاقة بين الشرطة والمواطن مش قمع وتشحيط عروق

لهذا اني نبي نقول ياشرطي معمر اني ولا انت والله والله والله وراكم لين يتنظف الجهاز من اشكالكم  وليبيا يبدا فيها شرطة محترمة

وطحت وين استرحت زي ماقال الشرطي الي لقيته في المركز يتابع فيا والله وبالقانون لاما ناخذ حقي ورد اعتبار  وحنسجل الواقعة في منظمات دولية كنوع  من انتهاك جهاز الشرطة الجديد بعد الثورة في حق المواطنين
واني قتلهم شوفت معاملة الشرطة الفرنسية ليا في دار القضاء  لما مشيت بخصوص  قضيتي ضد شركة التجسس الي تورطت في التجسس على نشطاء شرطة تحترم حقوق الانسان بصورة عالية جدا

لكن اني الي قعدت نفكر فيه زعما شاف الجاكة الخضراء لابستها مشي تنرفز؟
اهني تبدامشكلة كبيرة مدخلاناش في مؤيد ولا معارض لانها هذا تمييز المواطن مواطن قدام القانون بغض النظر عن اي افكار في راسه
وهكي انتهي اليوم الي مفروض كنت نكمل  التحقيق من طرق السكة،ونطلع نجيب ورق باش نمنعوا بيهم متسلقين من السفر ونسلموهم لهيئة تطبيق المعاير الوطنية
قعدت في  موال الشرطي الي شوربه زي  شورب الفاصوليا.

وحيقعد عندي امل وهدف ازالة  مبنى مكافحة الزندقة او الامن الداخلي سابقا طريق السكة من الوجود واقامة نصب تذكاري فيه يذكر بحقبة القمع والدكتاتورية والقبضة الامنية ،وسأسعى لهذاالهدف ولن اتخلى عنه أبدا ن لا اريد اي تعويضات ولا اي شئ الا ازالة هذا المبنى وهذه رغبة كل الذين اعتقلو فيه في زمن العقيد.
غيداء التواتي _طرابلس_21 اغسطس 2013