الأربعاء، 7 مايو 2014

مامعنى مدونة؟

شاب قالي هذا وين عرفت كلمة مدونة يحسابها مدونة التشريعات
مش قتله لا مش هذا معناها




المدونة هي مساحة الكترونية على الانترنت تعطيهالك مواقع زي بلوق سبوت على القوقل او موقع مكتوب الي تصكرت المدونات فيه الي كنت ندون عليه
المساحة زي موقع انترنت بس مجاني تسميها اسم مدونتك وتبدا تكتب فيها مقالة مصغرة او خبر بصورة او تنقل احداث يعني بالضبط انت مواطن او مواطنة مش صحفي ولا قريت صحافة تبدا تنقل الخبر في مدونتك وعلاش تنقل الخبر في مدونتك والناس تصدقك لانك مواطن شوفت الحدث بعيونك وتكتب بلا مقابل يعني مش مسيس ولا تاخد في مرتب

فرسان المدونات هما الي يكتبو باسمهم وصورهم يعني مايخافوش وفي الي يدير اسم متخفي ولا يحط صورته ولا شي يخاف من الحبس
المدون معنداش قوانين هو يدير قوانين لروحه مافيش من يمسحله ولا في من يديرله حظر
يخشو الناس يتبعو فيه يقروله لو لقو تدويناته مهمة

المدونات في ليبيا رقي سوقها في 2006 و2007 اني مدونتي من 2006 كنا نكتبو عن ليبيا ونتفكر اني شريت جهاز تسجيل صغير دونت بيه صوتيا وكان عبسي ديير في المونتاج وكنت ندير في نشرة اسبوعية عن شن الوضع في ليبيا ونشرو فيها في موقع اسمه راديو المدونين الليبين
اسسنا في 2007 اتحاد المدونين وكان على الانترنت بس وكان موقع والموقع هذا كنت نخلص فيه من جيبي سنويا وكنت اني الادمن وعبسي وبعدها حاربونا هلبا لين في شهر 12 عام 2010 صكره النظام نهائي وكان خونا سليم الرقعي عضو في الاتحاد وعيسى عبد القيوم وغازي القبلاوي وعدة مدونين اعضاء فيه
وكنت رئيسة الاتحاد وقتها
اول صفحة اخبارية على الفيس بوك هي صفحة اتحاد المدوين الليبين اخترقت في الثورةوكان الادمن فيها اني وعبسي وايناس سدوح وتيسير الصفراني تيسير كان في لندن ووقت الثورة لقي الصفحة انسرقت مننا وضاعت الصفحة الي تأسست في 2008 على الفيس بوك وكانت تنقل في الاخبار من مواقع المعارضة كرابط في الصفحة كنا نجيبو في الاخبار للناس الي تخاف تفتح موقع معارض
حاربونا هلبا الحق واخترقوا الموقع وكله تحت حرب النجاح والحرب هادي الي متبع يعرفها كويس مرضى من ذكورة وفاشلات
ونشهد بالله انه الموقع والصفحة كانو مصادر اخبارية لمواقع المعارضة والكل الي كان يخش قبل الثورة يعرف انه نشاط المدوين كان واضح
الاتحاد ماكنش مسجل انه ممنوع تديره في ليبيا واقترحنا على عيسى عبد القيوم زمان انه يديره في لندن وقال هكي مش حيصير لابد يؤسس في ليبيا لانه ليبي
المدونات كان ليها دور التحريض قبل الثورة زي
مدونة الحرية لعلاء الدرسي الي كان ينقل فيها عن مظاهرات اهالي بوسليم

مدونة نوهمة لليلي النيهوم الي كانت تنقل في يوميات حياتها في امريكا
كانت اصغر مدونة هي ايناس سدوح وتوة تقرا في طب قريب تتخرج تقريبا كان عمرها 16 سنة وتدون
واكبر مدونة كانت مام جمعونة مادي

وطبعا مدونتي كانت اسمها شواطئ وكنت ننقل في الاخبارمن ليبيا فيها
وكانت في مدونة تامزغا لمهيب قرادة الي توة اصبح اعلامي وكلكم تعرفوه
قبل الثورة في احداث هلبا غايبة عن الي خشو للنت جدد اني مدونتها كلها في روايتي
‫#‏مذكرات‬ مدونة عاشت في عهد القذافي