يوميات فتاة ليبية "الفساد"
اليوم وصلت لشخص عنده مستندات وورق على شخص ما في مكان ومنصب ما ،الاهم اني فرحت قالي اني ملقط ملف وتوة الموضوع مش حنسيبه واني وراه والحق اني فرحت بيه ، قلت الحمد لله في ناس تحارب في الفساد وتبي ليبيا تمشي صح تكلمنا على إنه ليبيا تعاني أزمة وطنية نوتفاهمنا نتلاقو مع شخص ثالث نشوفو حل للموضوع المهم في اخر الحديث قاليلو عندك اي حد بيعالج على حساب ليبيا نديرله ملفه في اي وقت صاحبتك جارتك قريبتكاني علاجي برا حيبدا في شهر 9 بتبرع من منظمات دولية بعد ماشافو انه حالتي معدش تستنا واني فعلا رفضت نعالج على حساب ليبيا من قبلتعرفوا اني شن صارلي لما قالي هكي؟ربع ساعة نسوق ومعاي منى البكوش في السيارة نبكي لاني اليوم صدمت في ناس هلبا لقيتهم فعلا مشاركين في فساد هلبا واسماء كنت نحترمهااني مش حنوقف ولا نييأس ابدا ،اني نعرف انه التركة صعبة تخلف وجهل وقبلية وفساد وجهوية، لكني يا ليبيا معندي شي نقدر نديره معنديش ملايين، ولا عندي عصا سحرية ولا عندي يا ليبيا حكم ولا في منصب نقدر نغير كل شي في وقت قياسيلكن يا ليبيا اني عندي حاجة واحدة هي حبي ليك وولائي ليك من شرقك لغربك لجنوبك لبحرك لجبالك نوعدك وعدة حرة زي ماوعدتك قبل الثورة وقت كنت نمشي على البحر ونبدا نحكي للسماء نقولك يا لييبا مش حنخذلك ولا نخليك ولا نييأس ولا نوقف ولا نبطل ابدا لين ينتهي الجهل والتخلف والفساد والقبلية والجهوية والمحسوبية وعدي ليك ووعد حرة كل الي نقدر نديره حنديره بعون الله، ربي معاي وحيساعدني ويسخرلي ناس معاي لاني ندافع على الحق ونحارب في غول اسمه الفساد لاني نبيك تمشي صح ، لاني نبي ثورة فبراير الي شوفتها وهي تكبر تاخذ الطريق الصح وبلادي تكون في مصاف الدول المتقدمة في كل شئ.وعمار يا ليبياغيداء التواتي _طرابلس_21 اغسطس _2013
ليست هناك تعليقات:
إرسال تعليق